Regina;)

（由於以下有口腔照片所以提定大家，慎入！！！）

 

 

不知不覺就過左兩個星期，最重要既係呢兩個星期入面忽然發現合埋口時，原本應係後面既上顎側門牙（門牙隔離）居然同下面隻牙頂住左，換句話講即係郁左！郁左！郁左！！雖然身邊既人都話無理由咁快，但當我睇反啲相就真係証實到啦！當然只係好少但對我黎講已經開心到跳~
 

除左上篇提到開初頭5日咬吾到任何野之外，之後5日只要慢慢食大牙基本回復正常所以只要剪開就無問題，第10日之後除硬野之外基本上已經完全正常食野！可能係因為我未剝牙但我真係要講真心一啲都吾辛苦（早知早啲箍）！！題外話本來開左包薯片獎勵一下自己，點知個口感完全吾同哂...只能話失去左感覺"脆卜卜"既能力。另外身邊有吾少朋友都特別特別提醒我食完野一定要清潔乾淨，因為鐡線同牙之間會有一個空位，不論食乜都好一定會卡係入面（最明顯既感覺就係你放好大啖入口但咬多兩下就離奇消失左一半！），更有朋友話佢中學同學拆箍既時候大部份牙縫都蛀左，OK我真係嚇親...我吾要辛辛苦苦整靚左啲牙之後爛哂囉！！！所以我已經養成每餐都一定刷牙或用水牙線既習慣～～

 

另外其他人成日話介損口、生飛滋等等問題暫時都未有出現，當然我希望永遠都吾出現！上箍之前因為啲牙吾整齊基本上我影相只會合埋個口笑，但本身個咀就已經"漲卜卜"再加上有架撐係入面，上唇可以話係前所未有咁漲，合埋口時比之前更似哨牙所以影相亦吾能合嘴微笑...不過我吾太介意SHOWOFF箍，什至好似覺得比起未上箍前開口笑好睇（自我感覺良好～）

 

4月11日係第四次覆診，上次醫生提過今次大概要花1個小時左右，可能已經比較慣今次無咁緊張！第一件事當然會問下"慣吾慣?辛吾辛苦?"之類，當我話吾辛苦無乜野，醫生同姑娘居然讚我，呵呵～即刻個人好得戚（可能佢地只係想比啲鼓勵我）！今次除左調緊鐡線之外醫生仲要將上次話差少少既上顎橡根圈（分離器）換返做介子，可能係因為前後戴左三個星期橡根圈（分離器），比起上次下顎換介子時更加無感覺，過程一樣同下顎一樣，度Size＞再加啲白色Gel(應該係膠水)係圈入面＞醫生再叫你咬幾下＞完成！戴上前醫生提到今次可能要多啲時間習慣因為上顎之間會有一條橋（下圖）而且無咁快拆嫁，八卦既我當然會問點解，而醫生就話係用作固定大牙，當下雖然吾係太明白但時間有限加上仲有千千萬萬既問題未問，所以打算完成之後自行上網搵答案，但可能因為我吾知佢正確叫咩名，而且好似吾多人有用呢個固定器所以搵吾到相關資料...之後聽到醫生剪剪下又拎個鉗轉轉下咁就完成，成個過程大概半個鐘左右，走既時間醫生話今次上顎酸軟感會比較明顯，但真係零酸軟零痛感！至於點解會咁快就搞掂相信係因為我啲釘釘無甩到！

 

 

至於上一段提到既問題呢，可能因為香港吾多Blogger有紀錄傳統牙箍既完整箍牙日記，而我參考較多台灣Blogger都有提到以下問題～

 

（以下資料只供參考，資料來源自網路及我牙醫，想知個人情況請向專業牙醫查詢）

 

Q1. 到底我係屬於骨性暴牙或齒性暴牙？

 

暴牙可分為「齒性」與「骨性」，齒性暴牙就是常見的門牙角度外飛，通常透過一般矯正即可收到良好成效。但骨性暴牙並不是門牙角度問題而是上顎骨突出，針對加嚴重骨性暴牙會採取正顎手術，但較輕微只要將骨釘放置在最有利的位置即可令牙齒移到理想的位置，能改善上下咬合與臉型，突顯齒顎矯正的治療效果，不必戴Katy Perry 頭套亦不必開刀。

 

雖然醫生之前睇報告無直接話我知係邊款，但有提到我上顎比標準突出少少所以有咬合不正同"假哨牙"問題，但我都係要再確認一次...OK我係「骨性」！

 

Q2. 我有無需要打骨釘？

 

骨釘是固定在牙齒上方的齒槽骨上，提供強而有力的、較穩固的錨錠支撐，幫助牙齒往期望的方向移動，好比在牙齒後方打樁加強矯正力使矯正拉力。骨釘並不是拿鐵鎚敲打而是像螺絲一樣，將骨釘旋轉入骨頭內加上局部麻醉，其實過程並不繁瑣，不會有流血不止的狀況，加上骨釘的直徑相當小，幾乎都不超過2mm。

 

之前未搵資料我就已經知有呢一招，因為介紹我呢個醫生既死黨一共上左4支骨釘，連剝牙都怕既我當然第一次見醫生連就即問吾打得吾得，當時因為咩報告都未出所以醫生都未答到我，由於呢個問題令八卦既我身痕，明知問完有排驚但都係忍吾住！Well...我一共要打2支，醫生話本來想幫我打4支但耐何我下顎細應該打吾到，就算打左都會好易甩！

 

Q3. 幾時剝牙？點解上左箍先剝牙？

 

呢個問題我身邊大部分朋友都有問，醫生既解答係上箍先可以令牙齒無咁實，之後剝牙就可以省時省水好省力而我亦會無咁辛苦，道理大概係一盆植物你先將根部既泥整鬆之後就會比較易扯出咁，反正我怕剝牙所以對我黎講真係覺得無乜所謂～最後醫生話按大概2個月後就會開始剝牙，到時會打埋骨釘......

 

Q4. 到底呢兩個星期我啲牙有無郁到?

 

醫生同姑娘只係笑笑口"呵呵～邊有咁快～"，當時超失望仲以為係我感覺錯...吾死心既我即刻搵証據，相信係因為移動太少所以除左我自己吾會有人發現，呢個Moment我只能話好彩我有好好紀錄

 

最後雖然醫生話上顎呢條橋要多啲時間習慣同上顎酸軟感會比較明顯，但黎到今日已經係三日，除左有幾次食麵同菜掛左係上面好似半天吊咁差啲嘔之外，同埋下顎錯位最過份既側門牙用舌頭頂佢有啲啲痺之外，真係無感覺...雖然舒服係好但我又會有啲擔心會吾會吾夠力呢，但又記得醫生有提到箍牙太大力大快對牙齒都吾係好事！好吧...我會乖乖一步一步黎～下一次覆診會係5月中，我決定每一至兩個星期就同個口影一次寫真，到時再比醫生睇下都好～～