3月28日係我正式上箍既日子，係覆診兩日前姑娘曾經打過黎確認Booking，仲有叮囑我一定要食飽肚先上黎！Well...聽完之後又再增添左啲緊張感，還好雖然仲戴緊橡根圈（分離器）既我已經開始食到野！2nd Cosultation既時候醫生已有提到上箍成個過程預計要2小時，男神當然都有陪緊張到癲既我去，可能係之前睇得太多BLOG亦問過太多朋友，所以清楚了解今日就係痛苦既開端！本身想叫男神將呢個神性、偉大而有紀錄性既一刻拍低，但奈何今次醫生吾比佢入黎見証，無計～
首先醫生橡根圈（分離器）呢個"小東西"折出黎+清洗乾淨，正確黎講係將8條攝左成個星期大菜渣整出黎，當時既感覺我只能用一個"爽"字形容！當時我有一剎那聞到超勁既口水味（當然吾好聞），之後醫生再幫我上排啲牙倒多一個模開始洗牙啦，戴左開口器之後我真係超怕羞，當然洗牙除左特別位置之外，大部份時間都吾會痛，但過程我都流左幾多牙血，醫生話我啲牙吾係污糟，但因為牙齒排列吾齊總有啲位點刷都刷吾乾淨，而個啲地方就會有牙石啦，箍完牙就會好好多！
忽然我就感覺到有舊鐡攝緊落大牙度，個個Moment我就知佢就係傳說中既介子啦，之前既橡根圈就係為左制造空位比佢，由於聽人請呢個過程幾痛，所以我即時緊張左，但好幸運既我完全無一絲痛既感覺，醫生只係叫我咬下咬下支工具，然後你就感覺到有啲野向牙罅度壓下壓下咁，後來先知吾痛係因為我條牙罅十分成功，呵呵～所以吾想痛既SIS記住忍手吾好整條橡根圈啦～醫生話上面排牙仲差少少所以未上得介子住，但我吾記得問差啲乜haha
之後當然係今日個主角牙箍，姑娘話痴粒粒上去既時間要確保乾爽如果吾係就會吾實嫁啦，所以佢會一直不停咁吸下我啲口水～一開始醫生擦左啲野係牙表面，我吾小心舔到少少好酸！！經過一系列既洗洗擦擦之後，我偷睇到醫生拎左支細細支既野出黎開始係牙面點點下，當時我就推斷佢就係膠水個類野，果然我終於見到要同我並肩作戰既"小朋友"，其實個過程真係無感覺只係放上去之後又照下燈咁，我仲差啲訓著左！忽然醫生行開左，原本係去左拎鐡線，個下我先知已經痴好真係無乜感覺～見到醫生將鐡線放係牙模上面度下又剪下咁，我又無啦啦開始緊張...扣條鐡線既時侯我就開始感覺到非常輕微既緊，忽然感覺到比野吉左一下，痛痛地先知原本醫生要響我退後左既牙後面，由左右兩邊牙罅之間入攝一條同頭髮咁上下粗既鐡線綁住正面既鐡線，雖然幾吾舒服但都未到痛，之後吾夠5分鐘就正式完成！
最後醫生要我感覺一下有無邊個位吉肉、吾舒服之類，同埋教我臘膠。其實有啲野頂住吾會舒服，但醫生真係好勁完全無野吉住亦吾需要調整！走既時間比左一支箍牙專用牙刷、一盒臘膠、止痛藥、飛滋膏同埋一支漱口水比我。其實過程入面醫生同姑娘一路都有同我傾下計分散下注意力咁，點知一問之下先知原來醫生已經有三十幾年經驗！！其實我一直都問醫生好多問題，得到答案之後又緊張又擔心又怕咁超煎熬，但由今日起我決定改為醫生完成程序先問個日做左乜，亦叫醫生吾需要話我知下一步要做乜（一種怕死既心態），例如吾少BLOG都有提到既牙釘之類，老老實實我真係會驚到喊而吾制然後影響效果，但如果醫生搞掂先同我講已經米已成炊可能對我黎講會更好！
雖然無辨法拍低自己上箍過程但Youtube上面都有幾多片，如果想睇既話可以參考一下～
最開始既第一個感覺就係合吾埋個咀，同埋可以有啲機關係口入面所以啲牙點放都吾岩咁，而且個樣比我想像中好如果吾大笑的話其實吾算太肉酸。由於岩岩上箍食野未有太大問題，我仲把握時間食多一餐KFC但食野既時候不停攝響牙箍到，煩到我燥燥地！！用牙籤＋"浪"口都吾乾淨.... 之後同上次一樣第二朝起身後酸軟加麻痺感覺強好多，平時其本上無乜感覺但真係乜都咬吾到，經過我既實驗其實得最後兩隻大牙用到，其餘既吾好話食野，輕輕咬下都痛！如是者我既早餐只可以係麥皮，午餐只會係雪芳蛋糕，晚餐淨食到粥，呢個情況大概維持左5日左右，黎到今日岩岩好一個星期雖然慢但我已經可以正常食野！
真心經過橡根圈（分離器）之後，我真係覺得呢個箍吾算得係好辛苦！不過醫生有提到呢條係我既第一隻鐡線所以會比較幼，所以我已經可以想像得到只會越來越辛苦！下次覆診會係4月11日約兩星期之後，已經開始期待親愛既牙仔快啲郁啦！
最後下面係我3月30日既牙齒狀況，以下有口腔照片，慎入！！！
文章標籤
全站熱搜
留言列表
