原本要3月21日先有既報告可以提早於19日睇到，對我黎講係一個好消息，而呢一日亦係我第二次見醫生及正式開始箍牙既第一步！一開始醫生拎左兩張X-Ray出黎同埋之前既造好既牙模，然後就開始細心地講解牙齒既問題，由於最初無打算寫箍牙日記所以就無影低，有機會再問醫生拎返先～
外觀主要既問題除左啲牙迫埋一堆之外，就係「兔仔牙」+ 雖然下顎骨長度標準但上顎骨就長左少少而造成既"假哨牙"，亦即係突咀！其實呢個問題真係好困擾，側面個咀超"木"，但好彩醫生話我吾算嚴重箍完會差好多！牙齒健康方面由於上顎兩隻智慧牙已開始生，暫時吾影響箍牙既過程，而下顎既兩隻就因為打橫生要開刀，而且都幾近三叉神經線所以都有啲風險，好彩因為我貪靚去箍牙，醫生可以預留位置比佢生出啲再離神經線遠啲先至剝牙，降低有關既風險！
結論連同智慧牙我一共要剝8隻牙，如無意外智慧牙會於完成療程後先剝，而其餘4隻分別係上下左右既小臼齒（即虎牙後面個隻），咁多年黎我都係因為呢一個環節而放棄，所以一聽到要剝咁多隻我真係超緊張，而醫生好似感覺到就即刻話"無咁快！超碼上左箍一兩個月後！"，其後再解釋因為牙齒好似植物咁而家好實，上左箍之後啲牙會鬆左到時再剝會復原得快啲！所以暫時可以放鬆住先！
至於價錢方面傳統金屬矯正器 Metal Braces 一共係40K，由於第一次見面我就已經提到吾考慮隱形牙套Invisalign所以無再問價錢，而醫生一直無提而我又心郁郁既透明傳統矯正器 Clear/Ceramic braces 價錢就係46K，但醫生就有提到除左價錢之外時間起碼要再多6-12個月！由於當時我仲未可以落到決定邊一款住，而兩款都要先係大牙邊上橡根圈（分離器），所以就整左先下次見醫生前再覆實用邊一款就可以，而呢一個分離器目的係制做牙縫比正式上箍後套係大牙困定器！可能係因為我啲牙太迫本身就已經無乜牙縫，所以醫生要用牙線先卡到佢入去，而呢個程序需時約一個星期左右就可以！
其實最初真係無乜感覺只係有啲酸軟咁，就好似有8條大菜渣攝住左咁，而醫生提醒呢種酸軟感會加強，如果橡根圈甩左出黎就由佢但係千萬千萬吾好用牙籤／牙線整佢，當晚因為怕死所以去左食粥但都仲食到炸兩！返到屋企先有時間睇清楚原來橡根圈係綠色，真係好似大菜渣咁好笑即刻放左上Facebook，點知身邊幾個箍完牙既朋友即時打電話黎慰問，講呢個過程超辛苦超痛，當下完全未體會到既我仲心諗原來箍牙都無想像中咁辛苦！
可能因為我既沾沾自喜個天要話我知係錯，第二朝起身5秒回過神後個種痛係呢一世都吾會吾記得！完全吾需要郁都痛，係由最入面隻大牙開始去到虎牙都超麻痺超酸軟超痛，而且係一啲野都咬到吾到，就連早餐既通心粉都要用生吞！到呢個時刻終於明白點解啲人話箍牙會瘦，除左因為食吾到，最主要係你會覺得自己好似廢人同食野好麻煩而無食慾，呢到要淨雞雞多謝我男神同媽媽，忍我食吾到野好忟憎仲陪足我食咁多餐粥。
係呢個Moment我就已經吾再考慮透明傳統矯正器 Clear/Ceramic braces，一諗到要比多6K反而要箍多6-12個月，簡直就係貼錢買難受！但當然亦都有因素係工作上暫時吾影響加上我吾太介意鋼牙，所以只係兩日我就覆實醫生下定決心做鋼牙妹。呢個情況大概持續左４－５日，去到第５晚我已經可以食野（比較慢），但28日就上箍即係2日後，所以呢兩日我只要諗到既吾理幾肥都照食！！！
最後我亦係3月19日（上橡根圈日）開始紀錄我既牙齒狀況，以下有口腔照片，慎入！！！
文章標籤
全站熱搜
留言列表
