由我決心去箍牙開始，上至搵資料下至精神支柱，其他人既箍牙日記真係幫左我吾少！所以我琴日正式上箍後決定要好好咁記錄低，除左希望比自己回味（聽人講睇住自己啲牙郁好開心！），亦希望可以有機會比人參考一下～
仲記得細個換牙前啲牙仔係十分整齊之後一年一年大個連媽媽都話我同細個個樣相差得遠，當時媽媽就已經想帶我去箍牙，但因為小朋友既時候去牙科保健留低左一個深刻既陰影，一知道要剝牙就怕怕所以一直使用拖字闕，到大個女想開始但礙於工作既緣故亦吾太方便，直至最近同男神考慮要結婚先至令到我決定吾可以再拖！
當決定去實行後第一步就係了解邊一款方式合適自己個人需要，由於網上有吾少詳細介紹/報導所以我吾一一介紹啦, 考慮過既就有以下：
１ 傳統金屬矯正器 Metal Braces（最後選擇左呢款）
優點係所需時間較短而且價錢平亦係咁多款入面力度最好所以出黎既效果最好！但缺點就係好明顯而且較易整傷口腔。
２ 透明傳統矯正器 Clear/Ceramic braces
原理同上，但因為粒釘改為樹脂、 陶瓷等等材質所以不顯眼。但力度不夠金屬好所需時間較長，而且容易被食物染色及易碎所以要介口，當然價錢亦較貴！
３ 隱形牙套 Invisalign
最吸引既優點就係完全不顯眼，但療程所需時間超長，而且要乖乖戴牙套否則前功盡廢，容易被食物染色一樣要介口，牙套力度不足效果不及傳統理想。最重要係好貴好貴好貴！
第二步就係選擇一個好牙醫，由於一直心郁郁想箍牙所以每次有朋友開始我都問題多多，最先考慮既當然係佢地牙醫。正所謂船頭驚鬼船尾驚賊，當中只要有少許名氣既牙醫網上都一定有壞話，而沒有名氣無資料既牙醫就更吾洗多講，更有身邊朋友試過有經驗不足既牙醫剝牙時，因為預吾準麻醉份量而要補針，什至過程感到痛（惡夢！），而呢個正正就係我咁多年都無勇氣去箍牙既原因！最後我用左兩個月搵資料決定左去我好姐妹介紹既－黃長Ｘ牙醫。事關佢一家四口平時都係光顧呢位牙醫，家中兩姐妹亦都係呢位牙醫箍牙，而之所以大力推薦是因為從不Hard-Sell、手勢好而且有30年經驗，姐妹更大力推薦手勢好完全無我擔心既惡夢出現！
坐言起行3月14日係我第一次見醫生，醫務所位於土瓜灣一棟較舊既大廈一樓，事前已問清楚故娘當日醫生會先評估一下、做牙模及寫轉介信去照X-Ray，價錢一共係$1500（如果之後想見其他醫生亦可以用呢啲資料），其實由於我好少睇牙醫所以都幾緊張所以男神都有陪住我，而且醫生好細心姑娘亦不時開玩笑，雖然只有半個小時左右時間比我地，但其實牙模約5分鐘就完成，其餘只係檢查一下、問下問題咁所以都好快！醫生建議我考慮 傳統金屬矯正器 Metal Braces 或 隱形牙套 Invisalign，而其實我自己知自己事因為吾係少Case，了解完後心底一早就已經吾考慮 隱形牙套 Invisalign！見完醫生就更加確認自己無選擇錯，雖然醫生吾算多野講但比人感覺好和藹可親而且好專業，而姑娘亦好識幫助人舒緩緊張，吾似其他牙醫診所咁冷冰冰咁!
離開診所就直接去左旺角雅蘭中心照X-Ray，由於之前係診所既價錢已包所以吾需要再付款，其實過程好快相反人多等得耐。一共影就兩張，一張係口腔而另一張頭骨，就係咁就萬事俱備！醫生需要一個星期左右時間去做功課，詳細情況就要一個星期先知啦！
呢一個星期入面男神知道我之後會受苦，所以就哂我食乜都得！但呢一個星期對我黎講都幾煎熬，又緊張又擔心又興奮！
文章標籤
全站熱搜
留言列表
